Прикажуваќи го полското веце во кое одел во тоалет, студената просторија каде што се капел и во зима, инфлуенсерот Александар Динев раскажа за скромните услови во кои растел во селото Балинци, Валандовско.
Познатиот млад инфлуенсер, во емотивно видео ги подотвори вратите на својот стар дом во Валандово, уривајќи ги предрасудите дека потекнува од богато семејство. Со солзи во очите ,тој раскажа за тешките почетоци и условите во кои пораснал.
Иако денес живее динамичен живот исполнет патувања, Александар не ги заборава деновите кога основните потреби биле луксуз. Најболната точка на неговото детство бил фактот што неговото семејство немало внатрешна бања.
„Ова беше нешто од кое најмногу се срамев како дете – тоа што ние немавме купатило. Јас немав тоалет сè додека не наполнив 16-17 години. Одевме повеце тука, во ова полско веце“, признава Динев на ТикТок, покажувајќи кон старата дрвена градба во дворот.
Најемотивниот дел на неговата посета беше средбата со неговите баба и дедо, кои сè уште живеат со спомените од неговото детство. Влегувајќи во скромната соба, Александар беше пречекан со неизмерна радост и прегратки.
„Каде си бе, бабино?“, извика неговата баба низ солзи, додека дедото, видно возбуден, го поздравуваше својот внук на кого е неизмерно горд, а Динев се присети како му помагал околу чувањето кокошки.
Неговата исповед открива и суровата реалност на секојдневната хигиена, која била вистински предизвик, особено во зимските месеци.
„Можеби ќе се прашате каде се бањав? Еве тука, надвор. Не сте свесни колку пати тука ми има излезено змија. Морав од вториот кат да се симнам долу со лонец врела вода“, објаснува тој.
Денес, неговите родители се преселени во Гевгелија, тој живее во Скопје, дел од братучедите му се во странство, а баба му и дедо му се само во куќата.
„Душата ми е празна, нема кој да ми отвори врата“, вели бабата во видеото, момент кој го расплака Динев.
„Многумина мислат дека сум некое размазено, богато детиште на кое родителите му купуваат сè, но тоа не е така. Доаѓам од доста сиромашно семејство. Сега, фала му на Бога, сме на многу подобро место“.
За крај, тој упати силна порака до своите следбеници:
„Знам дека има многу полошо од ова, но знам дека има и многу подобро. Едно нешто е најважно – да не се срамиме од тоа што сме!“, рече инфуенсерот во овие видеа.
