Со доаѓањето на летната сезона сите сакаме нешто свежо и не премногу калорично. Павловата торта со јагоди за мене е идеалниот десерт за жешките денови.
Се подготвува едноставно, а изгледа мошне префинето и примамливо за око. Супер спој на јагоди, шлаг пена и воздушеста пуслица.
Потребни состојки:
7 јајца на собна температура
400 г шеќер
прстофат сол
1 пакетче ванилин шеќер
За филот:
3 кесички за шлаг крема
375 мл млеко
свежи јагоди за декорација
Најпрво, во длабок сад започнете да ги матите белките со прстофат сол. Постепено додавајте го шеќерот постојано матејќи со миксерот. Додајте го и ванилиниот шеќер и матете околу 20 минути непрекинато. Ќе знаете дека белките се добро изматени кога ќе земете од нив низ прсти и повеќе нема да ги чуствувате зрнцата шеќер и кога шамот ќе стои цврсто кога ќе го превртите садот.
Изматените белки префрлете ги во тавче обложено со хартија за печење. Со помош на шпатула оформете ја Павлова тортата по желба и ставете ја во веќе загреана рерна на 95 степени околу 1 час и 15 минути. КОга тоа време ќе помине потребно е да не ја отварате рерната уште дополнителни 30-40 минути за да не распука тортата.
Кога пуслицата ќе биде комплетно изладена, нанесете изматена шлаг крема и декорирајте со свежи јагоди и гранчиња свежо нане.
Забавно готвење!
