Српскиот музичар Момчило Бајагиќ – Бајага во последно време сѐ почесто јавно одговара на негативните коментари на социјалните мрежи, а една од неговите преписки на Инстаграм предизвика големо внимание.
Расправијата започнала откако еден корисник, кој се претставува како Мирза, напишал дека повеќе не посетува концерти на „Бајага и инструктори“ поради ставот на музичарот за вакцинацијата за време на пандемијата.
„Откако во 2021 година бараше публиката на Ташмајдан да биде вакцинирана за да може да го следи концертот, веќе не одам на концерти на Бајага“, напишал следбеникот.
Бајага не останал должен на навредливиот коментар, па јавно му возвратил:
„Ти благодарам многу што не доаѓаш. Живееме со надеж дека никогаш повеќе нема да те видиме на нашите концерти. Примитивен коњ“, напишал музичарот.
Ова не е првпат Бајага да се најде во центарот на вниманието поради својата реакција во јавноста.
Неодамна, при враќањето од странство на белградскиот аеродром „Никола Тесла“, тој бурно реагираше кога го пречекаа новинарски и фотографски екипи.
„Каков ‘добар ден’? Што сте вие? Што правите со тој телефон?“, им се обратил Бајага на присутните новинари, јасно покажувајќи дека во тој момент не бил расположен за разговор со медиумите.
