Српската пејачка Мина Костиќ е задржана во Специјалната болница за психијатриски заболувања „Лаза Лазаревиќ“, пренесуваат српските медиуми.
Според информациите објавени од српскиот „Курир“, Костиќ била хоспитализирана по инцидент поврзан со агресивно однесување. Поради нејзината состојба, лекарите одлучиле да ја сместат под постојан медицински надзор, каде што моментално ги минува неопходните прегледи и проценки.
Извори за медиумите тврдат дека по приемот биле извршени потребните медицински прегледи, по што било проценето дека на пејачката ѝ е потребна континуирана опсервација и стручна помош.
Засега не е познато колку долго ќе остане на лекување, а лекарите не коментираат детали поради заштита на приватноста на пациентката.
Мина Костиќ ја започна својата музичка кариера на 16-годишна возраст, настапувајќи по белградските кафулиња и ресторани. Во 2000 година го објави својот прв албум „Срцев удар“, а пошироката публика ја запозна преку дуетот „Славија“ со покојниот Џеј Рамадановски.
Во текот на кариерата сними бројни хитови, меѓу кои „Мој лепи“, „Постар маж“ и „Гради од бетон“, а со години важеше за една од најатрактивните пејачки на српската естрада, поради што често ја нарекуваа и „џебна Венера“.
Засега нема официјално соопштение од Мина Костиќ или од нејзиното семејство во врска со нејзината состојба.
