Младата Македонка Бојана Миленковска, со економски факултет, иднината си ја гледа во својата земја, а не надвор од неа, како што е случај со бројни млади умови кои се исселуваат барајќи го своето место под сонцето надвор од земјата, инаку, позната по сончевината.
Ни се допаднаа размислувањата на Бојана и ви ги пренесуваме во целост како што самата ги објави на својата Фејсбук страница.
„Животот е како математичка задача, колку потешка, толку повпечатлива!
Така е и со нашиот живот секогаш треба да се потрудиме за она што го сакаме, за тоа што вреди треба поголем труд. Поради таа причина јас си ја сакам мојата Македонија и како иден сметководител и ревизор, тука ја гледам мојата иднина!
Замислував дека треба да живеам надвор од мојата држава, патот ме однесе во Малта, па преку Хрватска до Германија! Сите земји имаат своја убавина, но ниту една не е како својата татковина!
Еден ден се запрашав себеси, зошто сакам да се докажувам и покажувам во туѓа држава и да напредувам во неа кога можам истото да го постигнам и во својата, каде би можела многу повеќе да посветам внимание и време за напредок и усовршување на мојата кариера.
Зошто ние младите мислиме ако искочиме од нашата држава дека ќе ни биде многу поубаво, кога тука е најубаво, свои на своето!
Што ќе остане од нашата Македонија, ако сите заминеме од неа?
Да, може ќе стекнам нови пријатели во странство, но не и ново семејство!
Сакам да оставам една порака до сите нас младите, дека тоа што го сакаме не е далеку, туку е токму до нас, не треба да ги бараме далеку нашите цели, треба само да се потрудиме да ги оствариме на вистинското место во нашата Македонија до нашите блиски“, пишува Бојана.
