Во Србија почна да владее исклучително бизарен тренд, угостителите организираат лажни свадби, а на една од нив ќе настапи познатиот фолк пејач Дарко Лазиќ, кој се смета за пејач кој заработува сериозен бакшиш на свадби.
Имено, трендот на организирање лажни свадби станува сè попопуларен во Србија, а угостителите нудат можност да поминете време како да сте на вистинска свадбена веселба.
На една таква прослава на 28 декември, како што е наведено во огласот, ќе пее и Дарко Лазиќ, кој ќе ги развесели лажните младенци, лажните кумови, а и сите гости што ќе присуствуваат.
На лажната свадба задолжително се плаќа влезница и цената е 70 евра, сè е вклучено во тој износ. Ова значи дека за овие пари ќе добиете храна, пијалаци и атмосфера како да сте на вистинска свадба.
Токму овој конкретен оглас бил објавен на социјалната мрежа Икс со коментар: „Дали луѓето се толку очајни и немаат пријатели што мора да одат на лажни свадби?“.
Набрзо следеле поделени коментари од корисниците на социјалните мрежи. На некои им се допаѓа овој концепт, додека други се згрозени и шокирани.
Инаку, трендот на организирање лажни свадби првпат почнал да се практикува во Нови Сад, а една веќе била одржана на 1 јуни.
„Колкупати сте слушнале, повеќе не поканувам никого на свадби, помина нашата генерација? Би сакал да се облечам елегантно, да се забавувам, но каде? Е па, кажете „да“! Ние ви носиме свадба, на вистински начин. Ние ги избираме невестата и младоженецот, кумовите, имаме музика, танц, романтика, сè. А најлудото е што никој навистина не се венчава“, пишува во тој оглас.
