Балканската музичка ѕвезда Лепа Брена ја изненади јавноста со одлуката да ја прекине соработката со својот долгогодишен бенд, со кој настапуваше цели 16 години, и најави комплетно нов состав за претстојните концерти.
Пејачката нагласи дека разделбата поминала во исклучително пријателска атмосфера, објаснувајќи дека по долги години едноставно дошло време за промени и нови креативни визии во кариерата. Новиот бенд е веќе подготвен, а Брена најави големи изненадувања за својата публика.
Тажната судбина на нејзиниот славен дублер
Истовремено, фановите со носталгија се потсетија на култниот филм „Ајде да се сакаме“ (1987) и легендарната сцена каде Брена скока од Стариот мост во Мостар. Малкумина знаат дека за тој опасен скок таа имала машки дублер, славниот мостарски скокач Јадранко Финк, кој за овој ангажман добил хонорар во вредност од дури пет тогашни плати. За жал, само шест години по снимањето, Јадранко трагично загина во војната во Мостар од снајперски куршум, а неговото име денес е врежано на скалите што водат кон реката Неретва.
Инаку, Лепа Брена годинава подготвува голем емотивен спектакл, каде што ќе настапи пред публиката во Мостар за првпат по цели 17 години пауза.
