Откако им ги одзеде титулите на четирите внуци, данската кралица Маргрета се извини, но останува на својата одлука, јавува Би-Би-Си. Таа долго размислувала за оваа одлука и смета дека тоа е вистинскиот начин монархијата да биде во чекор со времето и да ја обезбеди иднината на самата институција. Вели дека жали што ја потценила реакцијата на нејзиното семејство.
– Не е забавно да гледаш како некој лошо се однесува со твоите деца. Тие се во ситуација што не ја разбираат – изјави принцот Јоаким, помладиот син на кралицата, за дански „Екстра Бладет“. Неговата сопруга, принцезата Мари, наведува дека нивното најмало дете било злоставувано на училиште поради ненадејната одлука на кралицата и неможноста на детето да се подготви за новите околности.
Одлуката е донесена минатата недела, а ќе стапи на сила следната година. Од јануари 2023 година, четирите деца на Јоаким повеќе нема да бидат принцови и принцези, туку ќе ги носат титулите грофови и грофици. Најстариот внук на кралицата, 27-годишниот Николај, изјави дека семејството е шокирано од одлуката. Неговите родители споделија дека кралицата Маргрета не разговарала со нив откако ја објавила својата одлука.
– Нејзиното височество кралицата сака да создаде подобри услови за нејзините четири внуци и да им даде можност да го обликуваат сопственото постоење, без ограничувањата со кои се соочуваат во кралската куќа – објави палатата минатата недела.
По острите реакции на нејзината одлука, таа се извини што ги потценила реакциите што ги предизвикала.
-Нема сомнеж дека моите синови и нивните сопруги заедно со моите внуци се моја голема среќа и гордост. Се надевам дека како семејство ќе најдеме мир за да ја надминеме оваа ситуација – рече кралицата.
Постариот син на кралицата, престолонаследникот Фредерик, исто така има четири деца на кои нема да им се одземат титулите.
– Промените се тешки и можат да ги повредат луѓето, но тоа не значи дека грешат, изјавила сопругата на Фредерик – принцезата Мери.
