Американскиот пејач и актер Арон Картер е пронајден мртов во својот дом во Ланкастер, Калифорнија.
Порталот ТМЗ објави дека телото на 34-годишниот Картер било пронајдено во када. Полицијата дошла во неговата куќа откако било пријавено дека маж се удавил.
„Арон замина“, напиша Лори Граф, менаџер на постариот брат на Арон, Ник Картер, во е-пошта до Њујорк Пост, објави овој портал.
Причината за смртта засега не е позната, но од полицијата кажаа дека немало траги на насилство.
Помладиот брат на пејачот на „Бекстрит бојс“ Ник Картер се прослави уште како детска ѕвезда во 1990-ите. Вкупно објави пет студиски албуми, од кои првиот на деветгодишна возраст. Неговите први два албума достигнаа милионски тиражи.
Подоцна водеше проблематичен живот, исполнет со дроги, јавни семејни караници и ментални проблеми. Во септември објави дека доброволно се пријавил на рехабилитација, но пред само неколку дена повторно бил уапсен поради возење во пијана состојба.
