По повеќе од 30 години поминати во Холивуд, Том Хенкс во едно неодамнешно интервју изјави дека во својот опус има четири филма кои ги смета за „прилично добри“.
Оскаровецот, кој глумеше во бројни блокбастери – од „Форест Гамп“ до „Елвис“, го најави својот претстоен роман The Making of Another Major Motion Picture Masterpiece („Создавањето уште едно големо филмско ремек дело“) што ќе излезе на 9 мај 2023 година. Книгата е измислена приказна за снимањето на мултимилионскиот филм за суперхерои и стрипот што го инспирирал.
– Никој не знае како се прави филм, иако сите мислат дека знаат – рекол Хенкс за People.
– Снимив еден куп филмови, а четири од нив се прилично добри, барем јас така мислам. Сè уште сум воодушевен од тоа како се спојуваат филмовите. Од идејата до треперењето на сликата на екранот, целиот процес е чудо – објасни 66-годишниот актер.
Хенкс додаде дека „снимањето филмови е многу тешка работа која бара долг временски период“.
– Тој период се состои од толку многу моменти на радост кои се спротивни на чувството на омраза кон себе. Тоа е најголемата работа на светот и најзбунувачката работа што ја знам – заклучи Том Хенкс.
Актерот претходно изјави дека идејата за потенцијално продолжение на „Форест Гамп“ е одложена речиси веднаш по успехот на првиот филм, кој најверојатно е на неговата листа од четири „прилично добри“ филмови.
– Ќе кажам дека се обидовме да разговараме за уште еден „Форест Гамп“, но разговорот траеше само 40 минути – откри Хенкс и додаде дека по тој разговор не се ни обиделе повторно да ја покренат темата.
Во ерата на повеќе продолженија, рестартирања и репризи, Хенкс додаде дека нема „обврска“ да ја репризира својата позната улога на Форест по оригиналниот филм од 1994 година, за време на чија продукција дури и платил од џеб за одредени сцени.
