Манекенот Ѓорѓе Дувњак, кој пред повеќе од две децении стекна огромна популарност благодарение на главната улога во спотот за песната „Иди док си млад“ на Светлана Ражнатовиќ – Цеца, и денес останува едно од најзапаметените машки лица од регионалните музички видеа.
Спотот, објавен пред 25 години, предизвика вистински бран реакции, а женската публика долго време го паметеше згодниот дрвосеча кој Цеца го „открива“ во шумата и го носи во големиот град. Дувњак тогаш имал само 23 години и беше еден од најуспешните манекени на нашите простори.
Пејачката неодамна во „Викенд премиера“ откри дека по многу години повторно се сретнала со него и тоа сосема неочекувано.
„Пеев на концерт во Австралија, веќе бев многу уморна и во еден момент ги затворив очите за да ја почувствувам емоцијата. Кога ги отворив, го видов момчето од спотот ‘Иди док си млад’, токму додека ја пеев таа песна“, раскажа Ражнатовиќ.
По настапот, Дувњак ѝ пријде зад сцената.
„Дојде и ми рече: ‘Добро вечер, Цецо’. Ми кажа дека е оженет и дека живее овде, во Австралија“, додаде пејачката.
По почетокот на 2000-тите, Ѓорѓе Дувњак се преселил во Австралија, каде што засновал семејство и продолжил со сосема поинаков, повлечен живот далеку од јавноста. Од тогаш не се вратил да живее во Србија, а денешниот изглед значително му се променил, велат оние што го виделе.
