Македонскиот музичар Драган Величковски – Тајзи, на Петровден (12 јули), стапи во брак со својата долгогодишна партнерка Ангела Анчевска, со која неодамна открија дека го очекуваат и своето прво дете.
Младенците свадбената прослава ја отворија со романтичен валцер. Невестата блесна во раскошна венчаница од тул, додека Тајзи се одлучи за елегантен бел свечен костум со машна-пеперутка.
Како што одминуваше вечерта, атмосферата стануваше сè повесела. Покрај современата музика, за гостите свиреа и зурли и тапани, а веселбата траеше до доцна во ноќта.
Вистинската кулминација следуваше кога на сцената му се придружија неговите колеги и пријатели. Тајзи заедно запеа со Слаткаристика, Пајак и 2Бона, претворајќи ја свадбата во вистински мини-концерт.
На свадбената прослава присуствуваа бројни личности од македонската музичка сцена, а дел од атмосферата заврши и на социјалните мрежи. Слаткаристика сподели видео на својот инстаграм-профил, на кое се гледа дел од веселбата, а во описот кратко напиша: „Го оженивме Тајзи“.
Тајзи и Ангела се свршија пред околу пет месеци, а нивната свадба доаѓа само неколку недели откако со јавноста ја споделија убавата вест дека наскоро ќе станат родители.
