Речиси две децении по прераната смрт на Тоше Проески, спомените од неговите концерти и денес будат силни емоции кај публиката.
Еден таков спомен сподели неговата обожавателка Ема Тодоровска, која објави фотографии и видеоснимки од настапот на македонската музичка ѕвезда во Античкиот театар во Охрид, одржан на 9 август 2006 година.
Фотографиите се направени на филм, во време кога секој кадар внимателно се одбираше, а резултатот можеше да се види дури откако фотографиите ќе бидат изработени. Токму затоа, Тодоровска со посебна емоција се присети на моментот кога првпат ги видела фотографиите од концертот.
„Мојата гледна точка пред 20 години на концертот во Антички театар, Охрид.
Исто така — имаш само 36 пози на филмот, сликаш, а не знаеш што. Одиш во студио, врескаш од среќа бидејќи си фатила вакви кадри“, напиша Ема покрај фотографиите.
View this post on Instagram
На споделените фотографии Тоше е забележан на сцената во различни моменти од концертот, додека пред него е бројната публика која ги пееше неговите хитови.
Тодоровска објави и видеоснимки од вечерта, едноставно наведувајќи го датумот и местото: „09.08.2006, Антички театар Охрид“.
View this post on Instagram
Ова не е единствениот спомен од Тоше што таа го сподели со своите следбеници. Во јуни објави и фотографии поврзани со неговиот голем солистички концерт на Градскиот стадион во Скопје, одржан на 23 јуни 2006 година.
