Една од најпрепознатливите ТВ личности од поранешна Југославија, Сузана Манчиќ, одбележа значаен јубилеј – 50 години кариера.
По тој повод, таа на социјалните мрежи сподели фотографија од прославата, каде позира во впечатлив црвен кадифен фустан, покрај свечена торта со бројот 50.
„Не славев роденден, туку 50 години од мојот прв хит ‘Огледалце, огледалце’. Половина век исполнет со работа, радост и незаборавни моменти“, напиша Манчиќ.
Во својата објава, таа се наврати на долгогодишната кариера, во која остави трага како пејачка, водителка и актерка. Зад себе има десет музички изданија, бројни телевизиски проекти и настапи на фестивали.
Публиката особено ја памети како заштитно лице на емисијата Лото, каде со години беше симбол на играта на среќа.
Покрај телевизијата, Манчиќ се појави и во филмовите Жикина династија и Ќао, инспекторе, како и во серијата Село гори, а баба се чешла, а објави и две книги.
Со половина век кариера зад себе, Манчиќ и понатаму останува активна и присутна на јавната сцена.
