Концертот на виртуозот на гитара Влатко Стефановски и националниот ансамбл „Танец“ кој медиумите во Србија го најавуваа како голем сценски спектакл во големата сала на Фондацијата „Коларац“ во Белград ја воодушеви публиката, а во очекување на импресиите од соседството ви ја пренесуваме сликата што за овој настан ја објави „Танец“ на својата фејсбук страница со неколку фотографии.
„И „Коларац“ во Белград е освоен. Вечерва нашиот оркестар и хор, заедно со гитарската легенда Влатко Стефановски не оставија никого рамнодушен во познатата сала „Коларац“ и за секоја изведба добиваа громогласни аплаузи. Очекувајќи ги официјалните одгласи оттаму, споделуваме неколку фотографии од публиката, која ја исполни салата до последното место“, објави националниот ансамбл.
Влатко Стефановски кој е особено горд на оваа инспиративна соработка со националниот ансамбл имаше неколку извонредни настапи со „Танец“ во земјава но, и во странство.
Специјално за овој проект се антологиските ора „Пелистерско“, „Касапско оро“, „Ситна лиса“, „Калајџско“, „Пајдушко“ , „Елено, ќерко“, „Јано, мори, севдалино“ изведени во нови аранжмани на Дамир Имери.
