Финска ова лето организира необична и амбициозна туристичка авантура – повеќемесечна потрага по скриено злато, која веќе привлекува интерес од авантуристи од целиот свет. Наградата за среќниот пронаоѓач е златна шипка вредна 20.000 евра (околу 23.300 долари), пренесува „Си-ен-ен“.
Лапонија, позната како дом на Дедо Мраз и пејзажи кои потсетуваат на бајковити светови, ги повикува туристите да ги заменат вообичаените зимски активности со летна авантура на отворено. Потрагата се одвива во туристичкиот центар Леви, популарна дестинација на северот на Финска позната по скијачките терени и по појавата на северната светлина.
„Лов на полноќното сонце“
Потрагата, наречена „Лов на полноќното сонце“, започнува на 18 јуни во центарот за посетители во Леви. Учесниците прво се регистрираат и добиваат почетна трага, а потоа преку низа дополнителни индиции се водат низ локалните патеки, атракции и знаменитости, сè поблиску до скриеното злато.
Организаторите наведуваат дека златната шипка може да биде пронајдена во било кој момент од потрагата, а нови траги ќе се објавуваат во текот на летото, постепено олеснувајќи го пронаоѓањето на локацијата. Финалната трага е најавена за 22 август.
Потрагата се реализира во соработка со рударската компанија „Агнико Игл Финланд“ и скијачкиот центар Леви, а учесниците се предупредуваат да се движат одговорно, да ги почитуваат природните области и да не вршат никакво копање или оштетување на теренот.
Леви и феноменот на полноќното сонце
Леви се наоѓа северно од Арктичкиот круг и е едно од најпознатите зимски скијалишта во Финска. Во летните месеци регионот го доживува феноменот на полноќното сонце, кога сонцето не заоѓа со денови, овозможувајќи речиси 24-часовна дневна светлина.
Според туристичката организација „Визит Леви“, летниот период во овој регион сè уште е недоволно откриен од туристите, и токму оваа иницијатива има цел да понуди нов начин за негова промоција.
Покрај зимските активности, Леви сè повеќе нуди и летни содржини како планинарење, параглајдинг, рафтинг и планински велосипедизам, со што се развива како целогодишна туристичка дестинација.
