Покрај клупата на Горан Стефановски во Дебар Маало, проследено со тивка акустична музика од бендот „Amniotic Fluid“, на 14 декември, со почеток во 17 часот, ќе се одржи настан на кој ќе бидат вклучени сијаличките во паркот и симболично ќе му биде оддадена почит на Горан, а по повод 70 години од неговото раѓање.
Настанот е организиран од Делегацијата на ЕУ и „Јуроп хаус Скопје“ и ќе биде повод низ дружење и неформален разговор да се потсетиме на моментите од животот на Горан Стефановски и неговите дела.
Паркот, покрај ЛЕД и соларните сијалички, ќе биде украсен со рачно изработени сувенири од природни материјали, а на секој од нив ќе биде испишан цитат на Горан Стефановски, на сите европски јазици.
„Сите живи суштества се раѓаат со инстинкт за преживување. Пајаците, за да преживеат, ткаат мрежи. Луѓето, за да преживеат, ткаат приказни. За нас нема ништо поважно од овие приказни. Тие се сржта на нашиот живот, ’рбетот на нашиот идентитет“, е цитатот од Горан Стефановски.
Преводите на цитатот беа обезбедени во соработка со Меѓународниот семинар за македонски јазик, литература и култура при Универзитетот „Св. Кирил и Методиј“ во Скопје, пријателите на Горан и колегите од Делегацијата на ЕУ.
Во случај на неповолни временски услови, неформалното дружење по обраќањата ќе биде преместено во Театарот на сенки и облаци, до гостилница „Наџак“ во Дебар Маало.
