Во тестаментот на неодамна починатиот поранешен италијански премиер Силвио Берлускони кој е објавен денеска, се наведува дека поголемиот дел од компанијата „Фининвест“ ќе им припадне на неговите деца Пјер Силвио и Марина Берлускони.
Заедно, тие двајца ќе поседуваат 53 отсто од компанијата, објавува агенцијата АНСА.
Берлускони му остави 100 милиони евра на својот брат Паоло, исто толку и на неговата девојка Марта Фасина, додека на советникот Марчело дел Утри му даде 30 милиони евра.
Покрај распределбата на имотот, италијанската агенција објави и порака која италијанскиот бизнисмен им ја оставил на своите деца.
„Ви благодарам и многу љубов до сите вас. Вашиот татко“, рече Берлускони.
Одлуката за распределба на сопственоста на Фининвест бизнисменот ја донел уште во 2006 година, кога го составил својот прв тестамент.
Во тоа време, тој изјави дека Пјер Силвио и Марина Берлускони ќе добијат мнозинска сопственост на компанијата, но дека неговото наследство ќе биде подеднакво поделено. Остатокот од имотот ќе биде распределен на преостанатите деца – Барбара, Елеонора и Луиџи.
Ниту едно од децата нема да има директна контрола врз компанијата како што имал нивниот татко, наведува АНСА, додавајќи дека нотарот во следните неколку часа ќе ги изврши сите законски обврски.
