Музичката легенда Момчило Бајагиќ – Бајага конечно ги разреши четиридецениските дилеми и теории на заговор поврзани со еден од неговите најголеми хитови, песната „442 do Beograda“. Години наназад публиката се обидуваше да го одгонетне скриеното значење на овој број, верувајќи дека станува збор за точната километража меѓу Белград и Скопје или меѓу Белград и Сараево.
Сепак, рокерот ги разочара сите што веруваа во мистичните теории, откривајќи ја едноставната вистина зад познатиот рефрен:
„Бројот 442 не се однесува на никаква конкретна оддалеченост и тука не постои никаква симболика. Точно е дека е приближна километража до Скопје или Сараево, но тоа не ми беше во главата кога се одлучив за тој број. Го зедов бидејќи сакав да наведам некоја подлабока дестинација, а не 20 километри, а овој број совршено се римуваше.“
Покрај оваа исповед, во јавноста повторно стана актуелен и фактот дека Бајага е автор на еден од најголемите фолк-хитови на сите времиња — песната „Da budemo noćas zajedno“ на Весна Змијанац. Оваа песна го означи пресвртот во кариерата на пејачката, трансформирајќи ја во поп-фолк ѕвезда, а таа и денес со гордост истакнува дека текстот е дело на познатиот рокер.
