Актерката Анџелина Џоли поднесе противтужба со сериозни обвинувања против нејзиниот поранешен сопруг, актерот Бред Пит. Во неа таа детално ја опиша случката наведена како злоставување во приватен авион во 2016 година.
Во тужбата поднесена во вторникот во Лос Анџелес од страна на адвокатите на популарната актерка таа тврди дека на 14 септември 2016 година имало расправија во авион, што наводно било причина таа да поднесе барање за развод неколку дена подоцна.
„Кога едно од децата вербално ја одбранило Џоли, Пит му се нафрлил на сопственото дете, а Џоли го фатила одзади за грбот за да го спречи. За да се ослободи од неа Пит се фрлил на седиштата во авионот и ги повредил грбот и лактот на Џоли“, стои во докуметите доставени до судот и следува:
„Децата се втурнаа внатре и сите храбро се обидуваа да се заштитат еден со друг. Пред да заврши Пит давеше едно од децата, а друго удри по лицето. Некои од децата го молеа Пит да престане. Сите беа преплашени.“
Освен тоа, за време на „многуте напнати часови“ од летот, Пит „повремено излегувал од задниот дел на авионот за да им вика и да ги пцуе“ и „во еден момент ја полил Џоли со пиво, а потоа ги полевал децата со пиво и црвено вино“, се наведува во противтужбата која беше поднесена како одговор на тужбата што Пит ја поднесе против Џоли неколку месеци претходно за продажба на нејзиниот удел во нивниот француски замок.
Адвокатите на Пит сѐ уште не се огласиле по ова прашање.
