Ален Исламовиќ, поранешниот пејач на култната рок група „Бијело дугме“, во последните години е стациониран во Бихаќ во Босна и Херцеговина, каде што поседува вистинско богатство, како и приватен бизнис.
Екипата на „Папарацо лов“ отишла во Бихаќ за да го евидентира својот имот, а крупна работа во неговата мапа на имоти претствува луксузна вила со базен, која, инаку, ја издава под наем, и од која остварува добра заработка на годишно ниво.
Пејачот поседува и тениски клуб со својот брат, а снимките од нивните тениски терени од воздух ве оставаат без здив.
Сепак, ова не е крајот – Исламовиќ во последно време одгледува лешници, кои ги продава на позната италијанска компанија која произведува најпопуларни слатки, а вака изгледа неговата плантажа.
Ален Исламовиќ има вкупно 1.500 садници, а бидејќи станува збор за лешник со врвен квалитет, познатата италијанска компанија „Фереро Роше“ одлучила да го купуваат од него, пишува српски „Курир“.
Како што дознавме од изворот, Ален остварува добра заработка од продажбата на лешници секоја година.
– Сумата се движи во зависност од временските услови во текот на годината. Понекогаш приносите се поголеми, а понекогаш помали. Генерално, Ален заработува околу 50.000 евра годишно. Тој е многу задоволен од бизнисот, особено од тоа што стана соработник со толку престижна и значајна глобална компанија како „Фереро“. Тие се деловни гиганти кога станува збор за купување и преработка на лешници, а неговиот лешник е со врвен квалитет и ги исполнува сите стандарди на европски квалитет за извоз. Ова значи дека неговата плантажа е сертифицирана и контролирана од Европската Унија – рекол соговорникот.
Пејачот често зборуваше за својот приватен бизнис, на кој е многу посветен. Целото семејство му помага на фармата.
– Тоа е моето слободно време помеѓу викендите. Мојата фарма, која ја средуваме и управуваме јас и братот на мојата сопруга, има површина од 25.000 квадратни метри. Работата на плантажата започнува од март, април и трае до септември или октомври. За седум дена, доволни се два за одржување на плантажата, наводнување, заштита од паразити, прскање, хранење преку корења, лисја и така натаму. Оваа љубов кон земјата и земјоделството ми ја всади мојот татко, кој ја сакаше. Моите сорти се најбарани на светскиот пазар за фабрики за чоколади, за преработка на ликери и производство на масло. Ќе работам на брендирање на моите плодови под името „Лешник од Уна“, а тоа ќе започне за неколку години. Кога ќе се пензионирам, мојата фарма ќе има капацитет помеѓу 10 и 15 тони лешници – изјавил Ален за порталот ЦДМ, па продолжил:
– Да го пробате мојот лешник, нема да верувате, тоа е како да сте зеле лажичка „Нутела“. Испратив неколку лешници во Швајцарија на анализа и не можеа да поверуваат дека такво нешто постои на Балканот и дека се одгледува. Она што јас го засадив се најдобрите и најслатките сорти во Европа. Ова се многу големи лешници. Тоа е работа на иднината, им советувам на сите да почнат да се занимаваат со тоа – рече тој, па додал:
– Тоа е сорта што ја нарекуваа и Титови лешници, бидејќи Тито им наложил на своите агрономи да му одгледуваат сорта што може да успева во такви подрачја. Тоа е посебен плод. Денес, лешниците се споредуваат со злато. Се користат во фармацијата, и тоа во големи количини. Од лешникот се произведуваат масла за козметички цели. Лушпата од лешникот е најдобрата калорична вредност за производство на пелети за греење, а коренот за одгледување тартуфи, ако некој знае како да ги одгледува. Накратко, тоа е феноменално растение кое раѓа од 80 до 100 години и нуди големо богатство на оние кои се грижат за него – открил Исламовиќ за медиумите.
