Кантавторката Теодора Павловска, позната и како Теја Дора, без сомнение се вбројува меѓу најголемите музички феномени од регионот во последните неколку години. Нејзината песна „Џанум“ продолжува да руши рекорди на дигиталните платформи и да носи значителна финансиска добивка, пишуваат српските медиуми.
Според достапните податоци, вкупната заработка од „Џанум“, заедно со другите песни објавени во истиот период, надминала околу 800.000 евра. Станува збор за приходи остварени преку сите поголеми стриминг-сервиси, меѓу кои Спотифај, Дизер, Јутјуб и други музички платформи.
Посебно се издвојува платформата Спотифај, каде што Теја Дора, според проценките, месечно заработува меѓу 6.000 и 7.000 евра, што ја позиционира во самиот врв на регионалната музичка сцена кога станува збор за дигитални приходи.
Песната „Џанум“ веќе подолго време има стабилна публика ширум светот и е слушана во Европа, Азија и други делови од планетата. Во последните месеци, сепак, доживува вистинска експанзија во Бразил и Латинска Америка, каде што стана еден од најслушаните хитови и редовно се наоѓа на популарните плејлисти.
Успехот на Теја Дора се смета за доказ дека квалитетната музика од Балканот може да стигне до глобалната публика и без агресивна промоција или медиумски скандали. Со еден хит, младата авторка успеа да изгради сериозен музички и деловен успех.
Доколку трендот на раст на слушаноста продолжи, нема сомнение дека сумата од 800.000 евра ќе продолжи да расте, а Теја Дора дополнително ќе го зацврсти статусот на една од најуспешните музичарки на новата генерација.
