Со недели се зборува за новиот албум на една од најголемите ѕвезди во регионот. Таа денес го најави со синглот „Фалиш ми“, што воедно е и првата снимена песна од албумот, но и нејзина прва соработка со бугарскиот пејач Азис.
„Кога Филип ми го предложи Азис знаев дека тоа ќе биде мал чекор за него, но голем за оваа песна, како што и докажа со неговата маестрална изведба. Уште кога почна да се создава песната Азис ни беше на ум и мило ми е што ми се придружи. Знам дека долго чекавте нова песна и ми недостигавте, се надевам и јас вам“, изјави Северина по повод новиот сингл.
Северина и Азис, кој учествуваше во бугарската верзија на Големиот брат, а во 2017 година го сними дуетот „Те оставам“ со Јелена Карлеуша, никогаш не се сретнале, а видеото го снимале одделно во временски интервал од еден месец поради пандемијата, соопшти ПР тимот на Северина.
Спотот, во чија продукција учествувале повеќе од 50 соработници, е снимен во клубот Лафајет, а кореографија за Северина, театарските балетани и клубските танчери е на Милица Церовиќ. Пејачката го нарече својот нов материјал сериозен поп и изјави дека е поинаков од се што снимила досега.
