Една од најпрепознатливите музички имиња на овие простори, Весна Змијанац, денеска, 4 јануари, го одбележува својот 69. роденден. Иако јавноста со децении ја доживува како силна, самоуверена и харизматична жена, нејзиниот животен пат бил сè, само не лесен.
Родена во Никшиќ, детството го поминала во населбата Ковачи, во близина на Краљево. Токму од таму започнува нејзината приказна, која подоцна ќе ја одведе до врвот на музичката сцена во поранешна Југославија. Весна беше меѓу првите што поставија високи стандарди кога станува збор за сценски настап, визуелен идентитет и односот кон публиката.
Две загуби што оставиле длабока рана
Зад сценските светла се кријат и најтешките моменти од нејзиниот живот. Малкумина знаат дека Весна изгубила две бебиња, и тоа во поодмината бременост. За тие болни искуства таа искрено пишува во својата автобиографија, без разубавување и без прикривање на болката.
Првото дете го изгубила во 1986 година, во седмиот месец од бременоста, а само една година подоцна и второто – повторно под слични околности. Таа подоцна признава дека тие моменти ја оставиле без сила и надеж, но и дека токму тие трагедии ја направиле посилна.
Од бракот со Владо Јовановиќ, во 1989 година, ја добила ќерката Николија, која подоцна тргна по нејзините стапки и изгради своја музичка кариера.
Борба за живот и враќање на сцената
Во март 2023 година, Весна Змијанац имала сериозна операција на отворено срце, при што ѝ бил вграден бајпас. За време на закрепнувањето, покрај неа постојано биле ќерката, зетот Реља Поповиќ и внуките. Иако неодамна повторно имала здравствени проблеми и неколку дена поминала во болница, таа многу брзо се вратила на сцената, покажувајќи дека не се откажува лесно.
Контроверзна младост и љубовен живот
По завршувањето на основното образование, Весна се преселила во Виена, кај мајка ѝ. Во својата книга открива и дел од младоста што често се премолчува – врска со својот поранешен наставник, која подоцна прераснала во јавна љубовна приказна. Таа отворено признава дека тогаш ѝ бил потребен постар маж и стабилност што не ја чувствувала во тој период од животот.
Пред бракот со Владо Јовановиќ, Весна била во брак и со Миролјуб Аранѓеловиќ Кемиш, а нејзиниот љубовен живот отсекогаш бил тема на интерес. Важеше за еден од најголемите женски симболи на своето време, но зад таа слика стоеле многу лични борби.
И покрај сите животни удари, Весна Змијанац не запира. Таа најави голем концерт во Белградската арена, закажан за 14 мај 2026 година
