Хрватската пејачка и авторка на бројни хитови, Алка Вуица, гостуваше во емисијата „Шоу тајм“ на радио Хепи, каде што зборуваше за својата нова песна „Bella moja“, долгогодишното пријателство со Јосипа Лисац, семејството, љубовта и стареењето.
Зборувајќи за Лисац, Вуица откри дека публиката ретко има можност да ја запознае нејзината духовита страна.
„Најдобриот штос беше кога неодамна ја прашав: ‘Јосипа, што би направила ако ти го имаше мојот глас, а јас твојот?‘ А таа ми одговори: ‘Јас би се убила.‘ Таа е неверојатно духовита“, раскажа Вуица, додавајќи дека планираат заедно да снимаат кратки скечеви.
Пејачката откри и дека со нетрпение го очекува доаѓањето на својот прв внук, иако признава дека тешко ќе се воздржи да не се меша во воспитувањето.
„Јас ги почитувам само своите одлуки“, се пошегува таа кога беше прашана дали ќе биде баба која ќе ги почитува правилата на родителите.
Со насмевка додаде дека веќе има смислено и мото за новата животна улога заедно со пријателката Џијана Апостолски, која исто така наскоро ќе стане баба.
Особено емотивно зборуваше за својата покојна мајка, поетеса која пишувала на чакавски дијалект. Вуица моментално ја собира нејзината поезија со желба да објави збирка и да го зачува нејзиното творештво од заборав.
Таа се присети и на тешките моменти од последните денови од животот на мајка ѝ, критикувајќи го односот на палијативните служби.
Во разговорот откри и дека голема инспирација во животот и кариерата ѝ бил Дејвид Боуви.
„Кога дојдов во Загреб, еден пријател ме праша дали имам момче. Му реков: ‘Имам.‘ Кога ме праша кој е, одговорив: ‘Дејвид Боуви, само тој сè уште не го знае тоа‘“, раскажа низ смеа.
Кога станува збор за љубовта, Вуица призна дека отсекогаш била романтична и дека знаела да прави големи гестови за мажите кои ѝ се допаѓале.
Сепак, без двоумење изјави: „Мажите се преценети“, додавајќи дека нејзината пријателка Јосипа Лисац често тврди дека мажите се почувствителни и понежни од жените.
Пејачката отворено зборуваше и за стареењето, признавајќи дека не го прифаќа со романтична нота.
„Стареењето е ужасно. Не сакам да стареам. Секако дека имам своја година на производство, но сакам што подолго да останам млада“, рече таа.
Вуица не крие ниту дека користела естетски процедури. Откри дека неодамна направила лифтинг на лицето и дека повеќе верува во такви интервенции отколку во ботокс или прекумерна употреба на филери.
Според неа, естетските зафати можат да помогнат човек подолго да изгледа младолико, но важно е да се задржи природниот изглед и да не се претерува.
