Хрватската ријалити-ѕвезда Лаура Пргомет, позната по учеството во шоуто „Господин Совршен“, доби притвор во траење до 30 дена по инцидентот што се случи во кафуле во дубровничката населба Лапад.
Портпаролот на Жупанискиот суд во Дубровник, Перо Милоглав, за „Дубровачки дневник“ изјави дека судијата за претходна постапка го прифатил предлогот на Општинското државно обвинителство и ѝ одредил притвор поради сомнение дека сторила две кривични дела – напад врз службено лице.
Според наводите на обвинителството, Пргомет за време на приведувањето физички нападнала полицаец и полициска службеничка, која се здобила со полесни телесни повреди.
„Притвор до 30 дена е одреден поради опасност од повторување на кривичното дело, имајќи предвид дека осомничената покажала изразена упорност, агресивност и безобѕирност, навредувајќи и физички напаѓајќи полициски службеници. При тоа, полициската службеничка се здобила со полесни телесни повреди“, изјавил Милоглав.
Нејзиниот адвокат Роберт Бачиќ истакнал дека одлуката сѐ уште не е правосилна и најавил жалба.
„На Лаура ѝ е исклучително тешко. Многу тешко ја поднесува целата ситуација и искрено жали за сѐ што се случи“, рекол адвокатот.
Според досегашните информации, Пргомет била приведена во неделата вечер поради нарушување на јавниот ред и мир во кафулето „Бразил“ во Лапад.
Сведоци тврдат дека навредувала гости, кршела чаши и дел од инвентарот, поради што посетителите го напуштиле локалот. Поради нејзиното однесување била повикана Итната медицинска помош, а набргу пристигнала и полицијата. Дел од очевидците тврдат дека таа навредувала и физички нападнала полициски службеници.
Истрагата е во тек, а надлежните институции треба да ги утврдат сите околности што довеле до инцидентот.
