Хрватското специјално обвинителство за сузбивање на корупција и организиран криминал поднесе обвинение против Тони Цетински затоа што беше откриено дека користел лажен сертификат за вакцинација против коронавирусот, објави веб-страницата „Империјал“.
Според нивните сознанија, од документите што ги објавиле, заменик-обвинителот Вјекослав Шаулиќ на 28 декември 2023 година до Жупанискиот суд во Загреб испратил обвинение против 18 лица, меѓу кои и познатиот пејач.
Всушност, ова е ново обвинение во кое лицата се обвинети дека платиле за да добијат лажни потврди дека се вакцинирани против ковид-19 и со тоа да се стекнат со право на дигитална ЕУ-пропусница за ковид-19. Обвинетите се товарат дека му дале пари на посредникот Иван Џелалија, така што медицинската сестра Петра Румиха, која тогаш работела во Здравствениот дом Загреб Загреб и била овластена да пристапува и да внесува податоци во информацискиот систем на Министерството за здравство, лажно внесувала информацијата дека обвинетите биле вакцинирани.
Интересно е дека, според обвинението, посредникот за таа незаконска услуга добил различни суми на пари, па некои обвинети платиле сума од 265 евра, некои 200, а некои 100 евра. Обвинетите се бранеле на различни начини. Некои го негирале делото, некои веднаш го признале, има и такви кои се спротивставиле бидејќи морале постојано да плаќаат скапи тестови доколку не се позитивни за да не ги испрати работодавецот дома или да плати казна.
Како што понатаму пишува порталот „Империјал“, обвинението против гореспоменатите било испратено до Жупанискиот суд во Загреб во пресрет на 2024 година, но повеќето обвинети биле известени во изминативе недели. Во написот пишува:
„Кој нуди, или ветува поткуп на службено или одговорно лице за да изврши службено или друго дејствие во или надвор од границите на неговите овластувања што не треба да го изврши, или да не изврши службено или друго дејствие што треба да го изврши, или кој посредува во ваквото поткупување на службено или одговорни лица, ќе се казни со затвор од една до осум години“, се наведува во меморандумот.
Споменатиот медиум пишува дека во обвинението е наведено дека пејачот е одликуван со Орден на Даница Хрватска, дека нема осуди и дека против него не се води друга постапка, но не објавија како Цетински се бранел од кривичното дело за кое е обвинет.
Тони Цетински преку својот пи-ар за „Курир“ изјави дека не знае ништо за тоа.
