Балканската музичка дива, Марија Шерифовиќ, која веќе неколку месеци ја живее новата улога како мајка, ретко зборува за својата интимна страна. Но овој пат, таа реши искрено да им се обрати на своите следбеници на Инстаграм, отворајќи ја душата како ретко досега.
Иако умешно ги балансира родителските и професионалните обврски, Марија признава дека сè почесто се соочува со внатрешен замор – од секојдневната трка, од потребата за докажување и од борбата што ја води од ден во ден.
„Некогаш, баш кога сè ќе стивне… Кога ќе исчезнат бучавата, луѓето, обврските и мислите… Останувам сама со себе. И сфаќам колку сум уморна. Од траењето. Од докажувањето. Од борбата. Секој ден трчам по нешто, а заборавам на најважното – да застанам. Да здивнам. Да бидам благодарна“, напиша Шерифовиќ.
Во своето емотивно обраќање, таа посочи дека среќата не се крие во некоја далечна иднина или во остварените цели – туку во мали, секојдневни нешта што често ги земаме здраво за готово.
„Среќата не е таму некаде, ни утре, ни кога ќе постигнам нешто. Среќата е сега. Што утрово ги отворив очите. Што гледам, што имам кревет што ме грее, мир во кој можам да дишам. Среќа се децата што трчаат, мајката што ме прегрнува, некој чие име го изговарам со љубов“, вели пејачката.
Оваа порака, која многумина ја препознаа како лекција за забрзаниот живот во кој живееме, брзо се прошири на социјалните мрежи. Со едноставни зборови, но длабока искреност, Шерифовиќ уште еднаш покажа зошто е една од најавтентичните јавни личности на овие простори.
