Мајa Оџаклиевска во повеќе наврати отворено зборува за својот внук Лука, кој живее со аутизам и на кого, како што вели, целосно му се посветила.
Тој денес е сместен во установа каде добива соодветна грижа, а пејачката редовно го посетува, нагласувајќи дека животот со него не бил лесен.
„Сега јас се грижам за внукот. Тоа не е сила, тоа е љубов. Љубовта го движи секој атом во телото. Би одела со него до крајот на светот – не е важно каде сме, само да сме заедно и тој да е смирен“, вели Оџаклиевска.
Таа откри дека Лука имал периоди на агресивни испади, кои било тешко да се контролираат.
„Имаше моменти кога беше многу агресивен. Додека можев, го прегрнував и му велев: ‘Баба те сака, не прави така’. Но тоа се напади… До тука можев“, раскажува пејачката.
И покрај предизвиците, таа вели дека семејството се обединило околу грижата за него.
„Тоа е нешто против кое не можеме да се бориме. Тоа е неговата состојба и мора да ја прифатиме. Додека можам, ќе бидам тука за него. Сите се организиравме – ќерките, зетот… Сфативме дека не е до нас, туку дека тоа е дел од него“, додава таа.
Оџаклиевска откри и дека токму таа прва забележала дека нешто е поинаку.
„Кога беше мал, беше отсутен. Другите деца се љубопитни, прашуваат… Тој гледаше во една точка. Знаев дека нешто не е во ред, но другите не сакаа да го признаат тоа“, рече таа во емисијата „Корак испред со Сандра“.
И покрај сè, пејачката потенцира дека љубовта и прифаќањето се најважни во справувањето со состојбата.
