Фолк-пејачот Драган Којиќ Кеба деновиве престојуваше во Ниш, каде што на 3 јули ќе одржи голем концерт на Летната сцена во Нишката тврдина.
Пред настапот, Кеба решил слободниот ден да го искористи за прошетка низ градот и повторно да ги посети местата кои, како што вели, го потсетуваат на едни од најубавите моменти од неговата кариера.
Прошетката низ центарот на Ниш прераснала во вистински музички настан кога пејачот им се придружил на улични музичари и запеал заедно со нив. Собраните граѓани со воодушевување го следеле настапот, а многумина ја искористиле можноста да се фотографираат со него и да разменат неколку зборови.
Посебно емотивен момент за пејачот бил посетата на бистата на легендарниот Шабан Бајрамовиќ, со кого настапил на својот голем концерт во Ниш пред три децении.
„Ниш отсекогаш бил посебен град за мене. Тука доживеав некои од најубавите моменти во кариерата. Кога ќе се сетам на концертот од пред 30 години и на Шабан Бајрамовиќ покрај мене, тоа се спомени што никогаш не се забораваат. Денес дојдов повторно да ја почувствувам таа енергија и да ги поканам луѓето на концертот на 3 јули“, изјавил Кеба.
View this post on Instagram
