Австралија веќе со години е учесничка на Евровизија, а многумина сè уште се прашуваат што всушност би се случило кога земја од другиот крај на светот би ја однела победата на најголемото европско музичко натпреварување.
Клучна улога има Европската радиодифузна унија (EBU), организација која ги обединува јавните телевизиски сервиси од десетици држави. Токму членството во таа мрежа е главниот услов за настап на Евровизија, а не физичката припадност на европскиот континент.
Австралијците ја следат Евровизија уште од 1983 година, а натпреварот таму има голема и многу активна база на обожаватели. Токму поради долгогодишната популарност, EBU во 2015 година, по повод 60-годишнината на Евровизија, ѝ испрати на Австралија посебна покана за учество.
Првично тоа требало да биде еднократен настап, но одличниот резултат ги промени плановите на организаторите.
Иако Австралија може да победи, постои едно правило кое не се менува — Евровизија и понатаму мора да се одржи во Европа. Во случај на австралиска победа, тамошната телевизија SBS би го организирала натпреварот заедно со некоја европска телевизиска куќа, додека самото натпреварување би останало на европско тло.
Со тоа организаторите сакаат да ја задржат логистичката и продукциската поврзаност на Евровизија со Европа, без оглед на победникот.
