Претставничката на Австралија на Евровизија, Делта Гудрем, се претстави во второто полуфинале со песната „Eclipse“ и успеа да се пласира во големото финале што ќе се одржи вечерва.
Оваа 41-годишна пејачка и актерка е веќе добро познато име во родната Австралија, но и на милиони ширум светот, благодарение на улогата во сапуницата „Neighbours“ и дебитантскиот албум „Innocent Eyes“, кој го објави во 2003 година кога имала само 18 години и кој е еден од најпродаваните во историјата на Австралија.
Патот до евровизиската сцена за Делта Гудрем не бил лесен. Нејзината кариера привремено била запрена кога само неколку месеци по излегувањето на дебитантскиот албум ѝ бил дијагностициран редок облик на рак, Хочкинов лимфом, пишува „The Independent“.
„Целосно ми ја промени насоката на животот. Цела земја седеше пред мојата врата и гледаше како јас и моето семејство поминуваме низ тоа најдобро што можевме“, се присетила Гудрем во едно интервју.
Таа отворено зборувала за тоа како дијагнозата и лекувањето, вклучувајќи радиотерапија и хемотерапија, влијаеле на нејзиното физичко и ментално здравје: „Губењето на косата ми беше тешко затоа што сè уште бев тинејџерка… Но кога ќе ја изгубите косата, вклучувајќи ги веѓите и трепките, кожата ви е бледа и имате апаратче – сакате да се чувствувате убаво и почнувате да бидете креативни.“
По целосното опоравување, Гудрем објавила уште шест албуми, од кои пет стигнале до прво место на листите во Австралија. Сепак, во 2018 година се соочила со нов здравствен проблем. По отстранување на плунковната жлезда, доживеала парализа на нерв во јазикот, поради што преку рехабилитација и логопедска обука морала повторно да учи да зборува и да пее.
„Секој што поминува низ предизвик, без разлика дали се бори со рак или со нешто трауматично, поминува низ многу различни фази и моменти што ќе ги почувствува“, изјавила во 2021 година. „Тоа е процес чекор по чекор.“
Таа траума успеала да ја претвори во охрабрувачки момент. „Тоа навистина беше момент на ресетирање во мојот живот“, се присетила. „Се случи непосредно пред целиот свет да влезе во овој момент на ресетирање.“
