Српската фолк пејачка Светлана Ражнатовиќ – Цеца синоќа одржа концерт во најголемата концертна сала во Бугарија – Арена Софија.
Нејзиниот настап ги воодушеви бугарските обожаватели, кои ѝ подарија бугарско знаме на кое пишува: „Цеца, Бугарија те сака“. Овој гест ја разнежни пејачката, па не можеше да ги сокрие своите солзи радосници.
„Драги луѓе, ви благодарам за оваа љубов која трае со децении. Јас ја чувствувам вашата љубов, а се надевам дека и вие ја чувствувате мојата. Ние ќе се дружиме уште многу години, а следната година ве поканувам да дојдете на Ушќе и да си поминеме супер. На здравје“, им рече Цеца.
По завршувањето на концертот, бугарскиот медиум „БНТ њуз“ извести дека дошло до инцидент во центарот на Софија, односно дека крадец на автомобил се забил со автомобил во луксузниот автобус на Цеца.
Откако го нападнал полицискиот службеник, кој се обидел да го уапси, крадецот ја скршил бариерата на подземниот паркинг во деловниот центар „Милениум“ и притоа удрил во неколку автомобили. Меѓу нив бил и автобусот на Цеца, која била сместена во хотелот „Гранд Хотел Милениум“.
На обиколницата, крадецот на автомобили го запалил украдениот автомобил што го возел и избегал. Потрагата по него е во тек.
