Американскиот актер Кајл Меклахлан му оддаде почит на Дејвид Линч, визионерскиот режисер познат по филмовите „Син сомот“, „Малхоланд Драјв“ и серијата „Твин Пикс“, кој почина вчера на 78-годишна возраст.
„Пред 42 години, од причини што сè уште не ми се јасни, Дејвид Линч ме извлече од анонимност за да глумам во неговиот прв и последен високобуџетен филм. Очигледно, тој виде нешто во мене што дури и јас не го препознавав. Целиот мој живот и кариера му ги должам на неговата визија.
Она што јас го видов во него беше еден загонетен и интуитивен човек со креативен океан што се излеваше од него. Тој беше во допир со нешто на што сите ние само можеме да се надеваме.
Нашето пријателство процвета за време на ‘Син сомот’, а потоа и ‘Твин Пикс’, и секогаш го доживував како најавтентичниот и жив човек што сум го запознал. Дејвид беше во хармонија со универзумот и со својата имагинација на ниво кое изгледаше како најдобрата верзија на човекот. Не беше заинтересиран за одговори, бидејќи знаеше дека прашањата се она што нè тера да бидеме она што сме. Тие се нашиот здив.
Додека светот загуби извонреден уметник, јас загубив драг пријател кој замисли иднина за мене и ми дозволи да патувам низ светови што никогаш не би можел сам да ги замислам“, напиша актерот во својата објава.
На крајот Меклахлан потенцираше: „Ќе ми недостига повеќе од границите на мојот јазик и од она што може да го издржи моето срце. Мојот свет е многу побогат затоа што го запознав и многу посиромашен сега кога го нема. Дејвид, засекогаш сум променет и засекогаш твој Кејл. Ти благодарам за сè.“
