Пејачката Гоца Тржан е позната по својата природна, искрена и отворена страна пред јавноста и нејзините обожаватели.
Додека другите sвезди се мачат да го скријат секој детаљ од нивниот приватен живот Гоца секогаш искрено споделува ситуации и моменти што и се случуваат приватно.
Неодамна таа искрено сподели и дека имала проблеми при воспитувањето на нејзината ќерка Лена, која е веќе тинејџерка, а претходно зборуваше и за неуспешните обиди да забремени и да добијат заедничко дете со сопругот Раша.
Таа исто така сподели дека за разлика од повеќето нејзини колеги од сцената, таа се чувствува најудобно во „партали“, односно стари комотни парчиња облека за по дома.
Сепак, поради гостувањето на една домашна телевизија, таа беше принудена да излезе од омилениот лежерен стил и да облече нешто елегантно… Нејзин избор беше еден елегантен „мал црн фустан“, воедно и најпопуларното модно парче кај женската популација во кое секоја дама изгледа величествено.
За оваа пригода, целиот стајлинг на Гоца на момент потсети на гламурот за време на Златното доба на Холивуд, а како самата таа се чувствувала во оваа модна комбинација, Гоца сподели со пријателите и следбениците на социјалните мрежи.
Колку и да ја сакам пријатноста на комотната домашна „апа-драпа“ облека, исто толку го обожавам и „малиот црн фустан“, гламурозната шминка, фризура, рефлекторите и гламурот во едно студио… И, научив да се чувствувам убаво и во двете изданија, напиша Гоца на Инстаграм.
Малиот црн фустанот со интересен крој Гоца го надополни со блескава низа бели бисери и црни мрежести хулахопки. Дека овој моден изглед е полн погодок потврдуваат и бројните коментари на социјалните мрежи и комплиментите испратени до пејачката.
