Поминаа 17 месеци од трагичниот пожар во дискотеката „Пулс“ во Кочани, а сеќавањето на загинатите и болката на нивните семејства, пријатели и колеги не стивнуваат.
Ана Костадиновска, која кобната вечер настапуваше како придружен вокал на „ДНК“, со емотивна објава се потсети на својата блиска пријателка и колешка Сара Пројковска, која ја сметаше за сестра, како и на останатите членови и соработници на групата кои го загубија животот во пожарот.
Костадиновска сподели фотографии и видео од профилот „sky_full_of_angels“, посветени на загинатите, а со кратка порака ја опиша тежината на изминатите месеци.
„17!!! Долги, болни, тешки“ – напиша таа.
Ана и Сара заедно настапуваа како придружни вокали на ДНК во „Пулс“ вечерта кога избувна пожарот. Костадиновска успеа да се спаси од огнената стихија, додека Пројковска, заедно со други членови и соработници на групата, го загуби животот во трагедијата.
Во месеците по пожарот, Костадиновска во повеќе наврати споделуваше емотивни спомени за Сара и за своите колеги, чувајќи го сеќавањето на луѓето со кои ја делеше сцената.
