Адаптацијата на романот на Колин Мелој, илустриран од Карлсон Елис, ќе биде во режија на претседателот и извршниот директор на анимационото студио, Тревис Најт.
Студиото за анимација „ЛАИКА“ штотуку го најави својот следен проект—стоп-анимирана адаптација на романот „Wildwood“, чиј автор е Колин Мелој, главниот пејач и текстописец на групата „The Decemberists “.
Во април годинава се рашири веста за тоа дека анимационото студио планира за прв пат да влезе во водите на играниот филм, преку продукцијата на адаптацијата на романот „Seventeen“ од авторот Џон Браунлоу. Сепак, јасно е дека „ЛАИКА“ не се откажува од оригиналната страст – анимацијата.
Ако постарите генерации беа вљубени во „Labyrinth“ на Џим Хенсон, тогаш поновите ќе се вљубат во „Wildwood“
„Wildwood“ е фантастична приказна што се случува вон границите на градот Портланд, каде никој не би требало да се осмели да оди. Приказната ја следи младата девојка Пру МекКил, чие мало братче е киднапирано од јато гаврани.
Заедно со својот беспомошен соученик Куртис, Пру влегува во маѓепсаната шума во потрага по својот брат, надевајќи се дека ќе успее да го спаси и врати назад. Пру можеби верува дека е многу возрасна за бајки, но таа самата ќе се најде во една од нив. Ова е свет исполнет со чудни животни што зборуваат, разбојнички банди и моќни мрачни фигури.
Режисерската палка е во рацете на Тревис Најт
Иако деталите за анимацијата се ограничени во овој момент, засега е познато дека адаптацијата на романот „Wildwood“, илустриран од Карлсон Елис, ќе биде во режија на претседателот и извршниот директор на „ЛАИКА“, Тревис Најт.
Неговата кариера континуирано бележи успеси како „Кубо и двете жици“ што му донесе номинација за Оскар и одличниот приквел на „Transformers“, „Bumblebee“, додека пак за кинематографијата на филмот ќе биде задолжен повеќекратниот кандидат за Оскар, Кејлеб Дешанел, чие име стои зад кинематографијата на филмовите како „The Right Stuff“, „Patriot“, како и првиот дел на „National Treasure“.
Студиото „ЛАИКА“ денес претставува едно од најамбициозните студија за анимација, а меѓу низата стоп-анимации што го прославија студиото се и „Coralline“, „ParaNorman“ и „Missing Link“ – визуелно возбудливи авантури што со своите неверојатни сетови ја будат фантазијата на публиката без разлика на возраста.
