Целиот регион беше изненаден од дуетот помеѓу навидум некомпатибилното дуо, песната „Астронаут “, која ја снимија заедно Бајага и Девито. Овој сингл, за кој е снимено и видео, беше објавен пред два дена и веќе има над 750 илјади прегледи на Јутјуб платформата.
Текстот за песната, како и самата музика, ги работеа заедно двајцата музичари.
Под песната беа објавени бројни коментари од обожаватели. „Топ 10 неочекувани моменти“, „Бајага и Девито пеат за астронаути?! Во кој паралелен универзум живееме?“, „Верувам, не верувам“, „Да ми кажеше некој пред 5 години дека Девито ќе сними дует со Бајага, немаше да му верувам“, „Дуото што не го очекувавме“, „Дуото што не знаевме дека ни е потребно“, се само дел од работите што ги напишаа пријатно изненадените обожаватели.
Двајцата музичари одговорни за овој хит можеби доаѓаат од „различни светови“, но оваа песна докажува дека не се толку некомпатибилни. Момчило Бајагиќ, попознат по прекарот Бајага, ја започна својата сега веќе иконска музичка кариера во 1970-тите.
