Вчера се случи голема трагедија во Цетиње, каде 45-годишен маж уби најмалку 12 лица во, меѓу кои и две деца, со огнено оружје. Владата донесе одлука да се прогласи тридневна жалост и ги откажа сите прослави и празнични настани во градовите ширум Црна Гора.
Голем број познати личности од регионалната музичка сцена се огласија на социјалните мрежи, каде изразија сочувство и најавија дека ќе ги откажат или презакажат закажаните концерти во периодот на жалост.
Српската пејачка Александра Пријовиќ најави дека ќе го откаже концертот во Бар.
„Поради трагичниот настан што се случи во Цетиње, вечерашниот концерт во Бар е откажан. Сочувство до семејствата на жртвите“, напиша таа на Инстаграм.
И младата музичка ѕвезда Анѓела Игњатовиќ, позната како Бресквица, го откажа својот концерт во Херцег Нови.
„Драги мои, вечерашниот настап во Херцег Нови е откажан поради убиствата во Цетиње.
Ве молам, чувајте се. Слушајте ги инструкциите на надлежните и останете во своите домови.
Сочувство до семејствата на настраданите. Нашите срца се со нив“, напиша Бресквица.
Хрватската ѕвезда Јелена Розга требаше да настапи на првиот ден од годината во Тиват, но и тој настан беше откажан.
„Поради трагедијата во Цетиње, се откажува вечерашниот настап во Тиват. Сочувство до семејствата на настраданите“, соопшти Розга.
Дино Мерлин, Ади Шоше и Џек Лупино требаше да настапат во Будва. Илјадници луѓе пристигнаа на локацијата за да го проследат празничниот концерт, но жена од организацијата се качи на сцената и соопшти дека настанот ќе биде откажан поради трагедијата во Цетиње.
Потоа се огласи и Дино Мерлин.
„Длабоко сум потресен од оваа страшна трагедија во Цетиње. Срцето ми е скршено. Тажно и празно е до каде може да допре погледот. Мислите ми се со жртвите. Искрено сочувство до семејствата на настраданите. Боже, дај ни уште еден ден“, напиша пејачот на својот инстаграм-профил.
