Хрватската пејачка и текстописка Алка Вуица се прости од легендарниот Мишо Ковач, кој почина на 85-годишна возраст. На социјалните мрежи објави нивни заеднички фотографии и сподели емотивна порака во која се присети на нивното пријателство и музичката соработка.
Вуица откри дека средбите со Мишо секогаш биле исполнети со силни емоции. Како што раскажала, пејачот речиси секојпат се расплакувал кога ќе ја прегрнел, а особено ѝ бил благодарен за песната што ја напишала за него.
„Жал ми е што не ти напишав повеќе песни и што едноставно не живеев во твоето време“, напиша Алка во прошталната посвета.
Таа се присети и на почетокот на нивната музичка соработка. Ги поврзал заедничкиот пријател Зринко, кој ја поканил да учествува во создавањето на еден од албумите на Ковач.
Така настанала песната „Bog mi daje, Bog mi uzima“, која, според нејзините зборови, Мишо многу ја сакал. Вуица објаснила дека песната му била особено драга бидејќи била напишана искрено, од срце.
Токму оваа композиција ја избра како музичка подлога за објавата со која му оддаде последна почит.
„Патувај, легендо, во подобри светови, на небесните полиња каде што веќе те чекаат фанфари и ангели, предводени од твојот сакан син. Овде сите те сакаме и се молиме за твојата душа“, порача Вуица.
View this post on Instagram
Мишо Ковач почина на 31 октомври, на 85-годишна возраст, во својот дом. Според најавите, последното испраќање на легендарниот пејач ќе се одржи во Сплит, додека ќе биде погребан во Загреб.
