Сезоната за доделување награди заврши утрово со ултрагламурозната церемонија на Оскарите, и изненадувачки, омилените sвезди не разочараа со своите модни избори.
Црвениот тепих на Оскарите, освен што е глобален феномен последниве децении, туку е и мало трендовско предвидување за сè она што ќе се случува во модната индустрија во текот на годината.
Пенелопе Круз и Марго Роби своето идеално издание го побараа во модната куќа „Шанел“, а Натали Портман испрати феминистичка порака со елегантната наметка со потпис на креативната директорка на куќата „Диор“, Марија Грациа Чисури.
Потпишана од истата куќа, тоалетата на Шарлиз Терон беше ода на нејзините облини. Тоа е воедно и еден од трендовите за оваа година – стил кој му ласка на телото, а ѝ годи и на харизмата и делува како да се носи со леснотија.
Во тој дух се појавија Лора Дерн и Рене Зелвегер во беспрекорно скорените фустани на „Армани прајв“, кои од фигурата прават поезија.
На другиот крај од стилската скала секогаш посебната Били Ајлиш, во комплетот на „Шанел“, кој повеќе наликува на тренерки.
Приказната за одржливата мода, која во подеднаква мера е и луксузна, ја нагласија Кејтлин Девер, која се појави во фустан на „Луј Витон“ и се приклучи на иницијативата Red Carpet Green Dress, чија задача е да ја зајакне идејата за одржлива мода во свечените прилики.
Кон иницијативата се придружи и Саорис Ронан, за чие бајковито „Гучи“ издание е користена истата ролна од ткаенината од која беше направена нејзината тоалета на доделувањето на Бафта наградите.
Хоакин Феникс истраја во својот личен стилски предизвик во текот на целата сезона на престижни награди да го носи истото одело на Стела Мекартни.
Били Портер, кој секогаш го привлекува вниманието со своите модни комбинации повторно си остана доследен на себеси.
Во продолжение погледнете уште неколку впечатливи тоалети од црвениот печат.
