Руските милијардери вложуваат големи напори да ги заштитат своите суперјахти, пишува американскиот магазин посветен на луксузниот начин на живот „Robb Report“.
Поради санкциите против Русија по инвазијата на Украина, руските милијардери поврзани со претседателот Владимир Путин одлучиле да ги преместат своите јахти за да не бидат запленети од западните држави.
Податоците од Marina Traffica покажуваат дека најмалку четири мултимилионски суперјахти во сопственост на руски претприемачи моментално пловат кон навидум побезбедните води на Малдивите и Црна Гора, според CNBC. Овие преместувања доаѓаат во време кога САД и нивните сојузници сакаат да воведат дополнителни санкции против Русија.
Администрацијата на Бајден, на пример, неодамна објави нова работна група која ќе ги таргетира руските олигарси и нивните средства.
„Оваа недела ќе отвориме мултилатерална трансатлантска работна група за да ги идентификуваме, ловиме и замрзнеме имотите на санкционираните руски компании и олигарси – нивните јахти, нивните вили и сите други незаконски стекнати придобивки што можеме да ги најдеме и замрзнеме“, се вели во твитот на Белата куќа.
Франција, исто така, составува листа на имот во сопственост на руски тајкуни кои би можеле да бидат запленети под санкциите на Европската Унија.
Како одговор, милијардерите како Вагит Алекперов, кој е претседател на руската енергетска корпорација „Лукоил“, почнале да ги преместуваат своите скапи бродови за да ги заштитат.
Раскошната 70-метарска суперјахта Heesen на Алекперов, позната како „Галактика Супер Нова“, ја напуштила Барселона, Шпанија и се очекува да пристигне во матичното пристаниште на Црна Гора во наредните денови.
Три други јахти во сопственост на неговите колеги, руски тајкуни, сега пловат кон Малдивите. „Клио“ на Олег Дерипаска ја напуштила Шри Ланка пред речиси две недели, според Marine Traffic, и се очекува наскоро да пристигне во Индискиот Океан.
„Титан“ на Александар Абрамов пристигнал на Малдивите на 28 февруари. Абрамов е коосновач на производителот на челик „Евраз“. Наводно, на Малдивите се наоѓа и 87-метарската јахта „Нирвана“ на Владимир Потанин.
И Црна Гора и Малдивите во моментов немаат договори за екстрадиција со САД. Сепак, двете земји се членки на Обединетите нации, кои остро ја осудија руската инвазија на Украина. Црна Гора, исто така, најави дека планира да се приклучи на санкциите на Европската Унија против Русија.
