Секоја сабота Славчо Попоски, метео прогнозер, вонредно нè известува какво ќе биде времето во текот на целата седмица.
По невообичаено студениот воздушен бран кој ја зафати нашата држава и го донесе првиот снег на Попова Шапка, според Попоски овој викенд ни следува прекрасно, стабилно, суво и сончево време со мала локална облачност.
– Преку денот ќе биде топло со максимални температури кои ќе се искачуваат во интервалот од 25 до 31 степен, додека наутро сè уште ќе биде студено со минимални температури кој ќе се спуштаат во интервалот од 2 до 11 степени.
Во текот на следната недела, ќе имаме доста променливо време, односно ќе има и сонце и облаци, но и услови за повремен локален дожд. Затоа, внимавајте на здравјето!
– Ќе има услови и за нестабилност, проследена со грмежи и засилување на ветерот. Температурите повторно ќе се намалат, особено од вторник кога ќе се искачуваат во интервалот од 15 до 23 степени. Сепак, утринските температури ќе бидат повисоки и ќе се спуштаат во интервалот претежно од 8 до 14 степени, вели Попоски.
