Поранешниот светски боксерски првак во тешка категорија Мајк Тајсон се соочи со уште едно обвинение дека силувал жена на почетокот на 90-те години, пишуваат американските медиуми.
Tужбата овој месец во Њујорк ја поднела жена која не сака во јавноста да биде откриен нејзиниот идентитет, а бара отштетата од пет милиони долари за претрпена „физичка, психичка и емоционална болка“.
Жената тврди дека Тајсон ја силувал во лимузина, откако го сретнале во ноќен клуб во Њујорк.
Без да го наведе точниот датум, жената тврди дека тоа се случило на почетокот на 90-те години од минатиот век, приближно во ист период кога и Дезајр Вашингтон тврдеше дека Тајсон ја силувал во Индијанаполис.
