Кабинетот на градоначалничката Данела Арсовска спротивно на тврдењата на генералниот секретар Ѓоко Велковски дека сам поднел оставка информира дека Велковски е разрешен заедно со директорот на „Водовод и канализација“, Златко Перински, поради, како што наведуваат обиди за влијание во јавна набавка со милионски суми.
Пред реакцијата на Град Скопје го објавивме ставот на Велковски кој пак тврди дека бил разочаран од, како што вели „слабиот потенцијал за работа и несоработката од градоначалничката Арсовска во реализацијата на капиталните проекти за градот Скопје“.
Но, еве што вели кабинетот на Арсовска:
„Од функцијата Секретар на Град Скопје, во петокот е разрешен Ѓоко Велковски, а причина за разрешувањето е неговото влијание во спорна тендерска постапка за изведба на пречистителна станица во вредност од 136 милиони евра, средства кои се обезбедени од ЕБОР и ЕИБ. Велковски, во петокот е разрешен заедно со в.д директорот на ЈП Водовод и Канализација-Скопје Златко Перински поради обиди за влијание кои се сметаат за тенденција која ги потврдува основаните сомнежи на Град Скопје за самоволие и несоодветно постапување во постапката за избор на изведувач во милионски тендер. Градот Скопје нема да дозволи расипничко трошење на парите на скопјани, ниту финансирање на лични и теснопартиски интереси. Скопје е град на сите скопјани“, се вели во соопштението.
