Џиновската лунарна ракета на НАСА Space Launch System во средата го започна своето неколкучасовно бавно патување кон лансирната рампа додека се подготвува за првото пробно лансирање кон Месечината за нешто помалку од две недели.
На 29 август, ракетата висока 98 метри треба да ја лансира својата прва мисија во вселената без човечки екипаж. Тоа ќе биде клучно, долго одложувано демонстративно патување до Месечината за програмата на НАСА Артемис, проект на Соединетите Американски Држави вреден повеќе милијарди долари за враќање на луѓето на површината на Месечината како подготовка за идните мисии на Марс.
Space Launch System, чиј развој беше предводен од Boeing Co во изминатата деценија, излезе од монтажната зграда во вселенскиот центар на НАСА во Флорида, „Кенеди“, и го започна своето патување од шест километри до лансирната рампа, движејќи се со брзина помала од еден километар на час.
