Секој човек знае колку е здраво да се јаде овошје и зеленчук и тоа секојдневно. Таквата храна во својот состав изобилува со витамини, минерали и растителни влакна, кои помагаат во зачувувањето на здравјето и виталноста на телото и ја подобруваат работата на виталните органи. Сепак, можеби многумина не знаат дека во некои делови токму од овошјето и од зеленчукот се кријат опасни материи, па затоа нив во никој случај не смееме да ги јадеме.
Листови од домати
Во Европа доматите почнале да се одгледуваат во 18 век. Оттогаш па до денес, овој плод е еден од најчесто застапените на трпезите, без оглед на годишното време. Сепак, малкумина знаат дека овој вкусен и здрав зеленчук расте на стебло и има листови полни со токсини. Доколку се изеде дел од дршката или неколку листови, во дигестивниот систем ќе се случи непосакувана реакција, односно ваквата храна ќе биде причина за појава на желудочни тегоби. Тие можат да се појават како последица на присуството на токсичните материи соланин и томатин во листовите, гранчињата, но и во цветовите на доматот.
Ако се изеде поголема количина листови од домат, може да дојде до труење со фатални последици по човечкото здравје.
Семки од јаболка
Јаболката спаѓаат во најздравите овошја што изобилуваат со витамини и минерали, но во себе содржат и еден отровен дел – семките кои содржат компоненти што се содржат од шеќер и цијанид, кој е познат како амигдалин. Поради неговото јако дејство, до неодамна се веруваше дека може (секако под надзор на стручни лица) да се користи во борбата против појава на одредени типови рак, но за жал се покажа дека воопшто не е ефикасен.
Доколку се внесе околу 200 милилитри цијанид во телото, последиците можат да бидат фатални. Сепак, немојте да паничите доколку ненамерно проголтате неколку семки од јаболко. Човечкиот организам може да преработи, а потоа и да исфрли помали количини цијанид, без притоа да има какви било негативни последици врз целокупното здравје.
Листови од рабарбара
Стебленцата од рабарбара, растение кое кај нас не е многу познато, во комбинација со слатки јагоди се одличен летен десерт. Но јадењето на лисјата од оваа билка може да ви направи сериозни проблеми. Тие содржат оксална киселина и антрахинонски гликозиди, кои имаат дејство на отрови врз човечкиот организам кога ќе се сварат. Симптомите зависат од количината на изедените листови, а можат да варираат од желудочна болка и повраќање до сериозни напади.
