Откако беше објавено дека симптом на ковид-19 е и зголемената телесна температура, многумина почесто ја контролираат состојбата на термометарот. Сепак, експертите предупредуваат дека не треба да паничите ако забележите дека температурата ви е малку повисока од 37 степени.
Иако секоја температура повисока од 37 степени може да биде загрижувачка, работите не се толку едноставни и постојат многу лични, медицински и фактори од околината што влијаат на телесната температура и одредуваат дали таа е покачена кај некого.
Концептот за нормална телесна температура, не повеќе од 37 степени, ја постави во средината на 19 век германскиот лекар Карл Вундерлих, а тој стандард се одржа до денес. Сепак, многу лекари предупредуваат дека нормалната телесна температура е опсег, не само една бројка, и дека многу луѓе имаат температура и повисока и пониска од стандардната, а се чувствуваат сосема нормално и добро.
Нашата телесна температура често опаѓа наутро, а расте со приближувањето на ноќта. Кај луѓето со ковид -19, температурата била повисока и во текот на ноќта.
Како тогаш да се разликува нормалната телесна температура од покачената, која исто така може да укажува на ковид-19?
Температурата предизвикана од ковид-19 ќе остане висока и нема да се намалува и ќе ја почувствувате, додека нормалната температура која варира воопшто не се чувствува, велат инфектолозите. Покрај тоа, треската е придружена и со други симптоми, како што е треперењето.
За да утврдите со сигурност која е вашата нормална телесна температура, треба да ја мерите трипати дневно – наутро, попладне и навечер и да ги запишувате овие резултати неколку недели. На крајот ќе можете да ја одредите просечната температура нормална за вас за одреден период од денот. Кога ќе знаете која е вашата нормална телесна температура, полесно ќе ја процените вашата состојба и дали отстапувањето од тоа е знак да одите на лекар или не, пренесува Си-ен-ен.
Други фактори што можат да влијаат на вашата телесна температура се и некои лекови, кои исто така ја намалуваат температурата. Затоа, прочитајте го упатството што го добивате со лековите, за да знаете како и дали ќе влијае на вашата температура.
