Ковид-19 продолжува да влијае на нашиот живот и да ги нарушува нашите навики – и во економска и во емоционална смисла. Иако сите сме свесни за ризиците кои смртоносниот коронавирус ги претставува за нашиот живот, важно е да се разбере и симптоматскиот временски редослед кој вирусот го следи во текот на траењето на инфекцијата.
Првиот симптом на коронавирусот е најчесто температурата, но и тоа може да се влоши. Коронавирусот е респираторна болест, па затоа симптомите се многу слични на симптомите на настинката или грипот. Најчести симптоми се сува кашлица, температура, болки во грлото, затнат нос, болка во градите и отежнато дишење, замор, гастроинтестинална инфекција, како и губење на мирис и вкус.
Според неодамнешното истражување спроведено од истражувачи од болницата „Џонгнан“ на универзитетот во Вухан, сличен образец на симптоми е утврден кај 140 пациенти кои имале позитивен тест на вирусот. Истражувањето сугерирало дека кај околу 99 отсто од пациентите се појавила висока температура, а повеќе од половина чувствувале замор и имале сува кашлица. Околу една третина имале и болки во мускулите и отежнато дишење.
Еве временски редослед што покажува како се развиваат симптомите кај повеќето пациенти:
Прв ден: Првиот симптом на коронавирусот обично се појавува во форма на треска. Некои може да почувствуваат замор, болки во мускулите и сува кашлица, а мал број од нив имаат пролив или мачнини еден или два дена пред тоа. Овие симптоми обично траат четири дена.
Петти ден: Пациентите може да страдаат од болки во градите и отежнато дишење – особено ако се постари или веќе имаат некои хронични заболувања.
Седми ден: Според студијата на Универзитетот во Вухан, овој ден се одлучува дали пациентот треба да биде хоспитализиран или може да остане во самоизолација.
Осми ден: На овој ден кај тешко заболените од ковид-19 се развива синдром на акутен респираторен дистрес (AРДС), болест кај која во белите дробови се таложат течности.
Десетти ден: Ако симптомите продолжат да се влошуваат на десеттиот ден, пациентот веројатно ќе биде примен во одделот за интензивна нега. Овие пациенти веројатно имаат посилни болки во стомакот и недостаток на апетит отколку кај поблагите случаи.
Седумнаесетти ден: Обично на овој ден луѓето кои закрепнуваат или имаат благи симптоми ги отпуштаат од болница.
Иако научниците и медицинските истражувачи сè уште работат на развојот на клинички одобрена вакцина, потребно е и понатаму да бидеме претпазливи и да се придржуваме до пропишаните мерки со цел да се запре ширењето на коронавирусот. Покрај тоа, ако се чувствувате заразени или имате симптоми, препорачливо е да се изолирате од другите најмалку две недели или додека тестот не утврди дека сте негативни, пренесува „И-Tајмс“.
