Компанијата Orbital Assembly ги објави своите планови за изградба на две вселенски станици кои ќе содржат и простор за сместување на туристи. Изградбата веројатно ќе чини неколку милијарди долари, а станицата Pioneer треба да започне со работа во 2025 година и ќе може да прими 28 посетители, додека малку поголемата Vojager станица треба да ги отвори вратите за посетители во 2027 година и да прими 400 луѓе.
„Нашата визија е да го направиме универзумот дестинација што луѓето ќе сакаат да ја посетат, притоа задржувајќи ги познатите елементи како што е гравитацијата“, рече шефот на Orbital Assembly, Тим Алаторе во соопштението за печатот.
Тој објасни дека станиците се замислени како хибридни, односно ќе се ужива, но и ќе се работи.
Од компанијата најавуваат дека станиците ќе имаат вештачка гравитација која би им овозможила на гостите нормално да се движат, технологија која сѐ уште не постои на сегашните вселенски станици.
„Успеавме да развиеме безбедна и стабилна модуларна станица која ќе генерира приходи и ќе биде профитабилна побрзо од нашите конкуренти кои се прилагодуваат на распоредот на НАСА“, се вели во соопштението за печатот на OAC.
„Кога луѓето ќе се навикнат на вселената, тоа ќе ја промени нивната перспектива на Земјата. Вселенското патување е сè уште во зародиш и се надеваме дека ќе дадеме се од себе“, рече Алаторе.
